400 million foydalanuvchi, 20000 ta stiker, yangilangan soʻrovnomalar va oʻquv testlari uchun 400 ming yevro

Telegram oylik faol foydalanuvchilari soni 400 million nafarga yetdi, bu bir yil oldingiga nisbatan 100 millionga koʻproq.

Har kuni kamida 1,5 million yangi foydalanuvchi Telegramda roʻyxatdan oʻtadi. Jildlar, bulut xotirasi va kompyuterdan kirish imkoniyati Telegramni karantin davrida masofadan turib ishlash va oʻqish uchun ideal vositaga aylantiradi. Telegram dunyoda 20 dan ortiq mamlakatlarda eng koʻp yuklab olingan ijtimoiy tarmoq ilovalari roʻyxatida birinchi oʻrinda turganligining ajablanarli tomoni yoʻq – dunyo boʻylab odamlar katta tezlik bilan Telegramga oʻtishmoqda.

Telegramni 7 yil avval ishga tushirganimizda, biz odamlar har doim erkinlik va sifatni cheklovlar va oʻrtamiyonalikdan afzal koʻradi, deb hisoblar edik. Telegram va uning eskiroq raqobatchilari orasidagi masofa qisqarishi bilan eski fikrlarimiz toʻgʻriligiga yanada amin boʻlmoqdamiz. Aqlli va erkin boʻlganligingiz uchun minnatdorchilik bildiramiz!

Kelgusida nimalarni rejalashtirmoqdamiz? Ayni paytdagi butun dunyo boʻyicha yakkalanish videomuloqot uchun ishonchli vositalar qanchalik yetmayotganini koʻrsatdi. 2020-yilda videochaqiruvlar xuddi 2013-yildagi mesenjerlarni eslatadi: xavfsizlik yoki qulaylikni taklif qiladigan ilovalar mavjud, lekin har doim ulardan birini tanlashga toʻgʻri keladi. Biz buni tuzatishga umid qilamiz va 2020-yilda xavfsiz guruh videochaqiruvlarini ishga tushirmoqchimiz.

U paydo boʻlishi bilan, biz u haqida blogda yozamiz. Shunday ekan, soʻrashni toʻxtating.

Yangilangan soʻrovnomalar

Biz foydalanuvchilar bilimlarini sinashlari uchun Telegram soʻrovnomalarga Viktorina rejimini yanvar oyida qoʻshgan edik. Oxirgi haftalarda Telegram History and Features kabi @QuizBot orqali yaratilgan oʻquv testlari va viktorinalari ommalashayotganini kuzatdik. Bugungi yangilanish viktorinalarning taʼlimga oid imkoniyatlarini kengaytiradi.

Endi foydalanuvchilar viktorina savollariga javob berishganida paydo boʻladigan izohlarni qoʻshishingiz mumkin. Izohlar tufayli foydalanuvchilar xatolaridan oʻrganishi mumkin boʻladi, viktorinalar esa nafaqat bilimlarini tekshirish, balki oʻrganish imkonini ham beradi.

Masalan, Telegram History and Features boʻyicha ushbu tezkor testni sinab koʻring.

@QuizBot orqali viktorina yaratilganida, savollar uchun javob berish vaqtini cheklash mumkin – bu viktorinalarni yanada qiziqarliroq qiladi, ulardan talabalar guruh chatlarida imtihonga tayyorlanish uchun tez-tez foydalaniladi. Yangi animatsiyali taymer bilan har bir ishtirokchi unda javob berish uchun qancha vaqt qolganini koʻrishi mumkin.

Oʻquv testlari tuzuvchilari uchun 400 ming yevro

Ayni paytda 2 milliard oʻquvchilar maktablardan uzoqda va dunyo onlayn taʼlim vositalariga juda muhtoj. Biz bu muammoni hal qilish maqsadida barcha fanlar va darajalar uchun oʻquv testlari maʼlumotlar bazasinini yaratish orqali hissa qoʻshmoqchimiz. Buni amalga oshirish maqsadida bugun biz oʻquv testlari tuzuvchilari uchun 400 ming yevro sovrin jamgʻarmali tanlov eʼlon qilmoqdamiz.

Ishtirok etish uchun @QuizBot yordamida istalgan qiyinchilik darajasida istalgan mavzuda, istalgan tilda mualliflik oʻquv testlarini tuzing. Oʻzbek tilida Oʻrta asrlar Yevropa tarixidan tortib, nemis tilida Mikrobiologie für Expertengacha – savollaringizga kerakli istalgan mediafaylni qoʻshing, lekin muallifllik huquqiga amal qiling.

Tanlovga ariza topshirgan viktorinalar ichki qidiruvli katalogga qoʻshiladi. Ularni sifati va ommabopligi asosida bir nechta bosqichda eʼlon qilamiz. Birinchi bosqich uchun arizalar 15-maygacha qabul qilinadi.

Telegram jamoasidan ushbu va boshqa tanlovlar @contest kanalida eʼlon qilinadi. Oʻtgan yilning oʻzida biz tanlovlar gʻoliblariga 2 million yevro tarqatdik.

20000 ta stiker

Telegram stikerlar uchun ular birinchi marta eʼlon qilinganidan buyon yillar davomida mashhur boʻlib keldi, lekin bugungacha barcha eng yaxshi stikerlarni birdan koʻrishning iloji yoʻq edi. Yangi stiker katalogini kutib oling. U yerda oxirgi 5 yil ichida yaratilgan 20000 tadan ortiq yuqori sifatli Telegram stikerlarini koʻrishingiz mumkin.

Biror toʻplamni topish uchun qidiruvdan foydalanishingiz mumkin yoki agar Stikerlar muzeyi tarixi boʻylab sayohat qilishni xohlasangiz, roʻyxat boʻylab aylantirishingiz va bugungi ommaboplardan boshlab, yer yuzida eng birinchi Stiker sapienslargacha tomosha qilishingiz mumkin.

Androidda yangi biriktirmalar menyusi

Androidda biriktirma menyusining barcha boʻlimlari kengayadigan oynada ochiladi, ular menyuni qulayroq va foydalanish uchun osonroq qiladi. Shuningdek, ular animatsiyali ikonkalar bilan toʻldirildi.

MacOS uchun yangilanishlar

MacOS uchun Telegram foydalanuvchilari Ulashilgan mediafayllarga bevosita qayta dizayn qilingan profil sahifalaridan kirishi mumkin. Koʻplab jildlari borlarga Telegram Desktop uslubidagi ikonkalar bilan jild yon paneli yoqishi mumkin.

Quyidagi skrinshot yangilangan ilova ichidagi rasm tahrirlagichi orqali yaratilgan. Endi u rasmlarni yuborishda va tahrirlashda ularga chizish imkonini beradi:

Nishonga aniq urish

Oxirgi yangilanishdan emojisiga qoʻshimcha sifatida endi animatsiyali nishon emojisi orqali istalgan chatda birinchi boʻlib nishonga urishga urinib koʻring.

Umid qilamizki, ushbu yangilanish sizlarga – barcha 400 million foydalanuvchilarimizning har biriga yoqadi.

2020-yil, 24-aprel
Pavel Durov